MIFCO-in Ready To Serve (RTS) Sapthei & Lakhuihthei Tui an tlangzarh

(Leiba rûl zovin a hlawkin an kal mêk)

07.05.2026, Aizawl:  Vawiin tlai dar 4:00 khan Mizoram Food & Allied Industries Corporation Limited (MIFCO) chuan Chhingchhipa an hmunpuiah Ready To Serve (RTS) beverages Lakhuihthei leh Sapthei tui an tlangzarh a. Heng in mai theih theitui chi hnih hi Government of Mizoram Secretary Pu Ramchuana, Finance Department-in a tlangzarh.

Pu Ramchuana, Secretary, Finance Department chuan, "Hetiang tlangzarh theia an thawhrimna hi a hlutna chu an inpekna te a ni a, a ropui ka ti a ni. 13th Finance Commission-ah khan sum a harsa a, PSU zingah MIFCO pawh hi private kuta hlan rel a ni a. Sorkar tharin hmakna te chhawpin mumal deuha kalin product pahnih tlangzarh theiin kan awm leh ta a ni," a ti. 

Hetianga hmala tak tak te ṭanpui an inhuam thu Pu Ramchuana chuan sawiin, "Hmalâk tum tak tak te ṭanpuina han inpêk hi chu kan inhuam em em a ni," tiin MIFCO laka an inhuam thui thu a sawi bawk.

MIFCO lo ṭhang chho zel hi thlâwp tlat ila tiin khuallian chuan a sawi a, MIFCO leh ZOHANDCO chu mahni siamchhuah aṭanga ding chhuak thei an nih thu a sawi a. "Mahni tharchhuah nei tur in ni a, in ṭanlakna te a takin kan hmua a lawmawm ka ti. Tunhma aia hmasawn turin duhsakna ka hlan a che u," Pu Ramchuana chuan a ti.

Pu C. Lalnunnema, Vice President ZPM Gen. Hqrs. chuan, "Audit lama awm ṭhin ka nih avangin Corporation kha tihtawp vek kan duh ṭhin a. Amaherawhchu, sorkar thara kalphung tharah kan ram tiṭhang lian tura hmasawnna ropui tak ka hmu a, hmasawn zawnga kan kal ta hi a lawmawm ka ti," tiin Sorkar ṭanpuitu nih a pawimawh zawk thu a sawi bawk.

MIFCO Chairman Pu Lalṭhazuala Rawite chuan an siamchhuah te a hriselin a thianghlim thu a sawi a, sorkar laka an leiba an rulh zawh mai bâkah kum 2024-25 chhungin cheng nuai 14 an hlêp thu a sawi. Kumin 2025-2026 chu an la chhut zo hman rih lo a ni.

"Kan siam hi ei tlak, ei atana hrisel leh changkang a ni a. FSSAI certified a ni, Baibing, Rawtuai leh Mautuai ṭin siam chhuah thuai kan tuma kan enchhin mêk bawk," tiin MIFCO Chairman chuan a sawi a. Leiba cheng vaibelchhe 1.35 awm sa an chhawm chu an rul zo tawh a, an hlêp tawh mêk a ni.

MIFCO hian hmun thumah hmun lian tak tak an nei a, Sairanga an hmun chu Rel a lo thlen tâk avangin 'Warehouse Complex' atan siam an tum tih an sawi a. Bungbangla hmuna ran talhna chu 'outsource' tawhin Zo Meat kutah dahin, anni hian vawksa thianghlim an zuar a, electric bill an tum bakag fee an chhunglut bawk. MIFCO Chhingchhipah hian processing unit pahnih an buatsaih leh dawn niin Pu H. Lalrochâma, General Manager chuan a sawi a. Buhfai an supply bakah Petrol Pump siam turin hma an la mek bawk.

RTS tlangzarh inkhawm hi Pu Lalnunvela, Managing Director, MIFCO Limited-in chairman niin a kaihruai a. Vawiina tlangzarh tak theitui chi hnih - Sapthei leh Lakhuihthei tui in nghal theih hi ₹ 10an zêla zawrh chhuah tur a ni. Sapthei hi Kg 1 cheng 45-in an la a ni. Chhingchhipah hian Ropuiliani Women Farmer Producer Company Limited a awm bawk a, anni hian hmarcha an sawngbawla hmarcha ro ṭhahnem tak an hralh chhuak ṭhin a ni.