Aizawl, 29th April 2026 : Vawiin chawhnu dar 2:30 khan Commerce & Industries Department Secretary Office Chamber, Secretariat Building, New Capital Complex-ah tun kum hnih kalta chhunga MIFCO hmalakna hrang hrang Documentary Film chu Dr.H.Lianzela, IAS Secretary, Commerce & Industry Department chuan a tlangzarh.
Dr.H.Lianzela, Secretary chuan, "Mizoram sorkar hian Agriculture sector lam hi a dah pawimawhin hma pawh a la nasa hle a, a bikin lakhuihthei leh sapthei chingtu beidawng tawhten beiseina thar an nei hi ka lawm takzet a ni. Mizoram sorkar hnuaia PSU board hrang hrangte pawh tihlen a, thuneihna sang zawk pea tihchak an pawimawh hlein ka hria a, sawhthing leh kan thlai hrang hrangte pawh tha zawk leh tui zawka sawngbawl theih ni se a duhawm hle a ni. Mizoramah khualzin (tourist) an rawn pung zel.dawn a, Mizoram ti Mizoram theitu tur, kan economy thlenga tisang thei tur kan ngaihtuah a ngai.
Hetiang kawnga bul tan thartu MIFCO hmalakna leh hmachhawpte a ropui ka ti takzet a, an kal zelna tura duhsakna ka hlan a ni," tiin MIFCO Documentary Film chu Mizo mipuite leh ram pawn thlenga an lo en theih turin a tlangzarh.
Mizoram Food & Allied Industry Corporation Chairman Pu Lalthazuala Rawite pawhin thu sawiin, Mizoram sorkarin PSU-te min enkawl chhoh dan a lawmawm kan ti a, a bikin Chief Minister Pu Lalduhoma'n min tuipui em em a, kuthnathawktuten an thawhrah senga hlawkna an tel lai hi hmuh nuam a ti thin. Kum hnih chhung chauha hmalakna a la nih avangin hlawhtlinna lian leh ropui tak la awm lo mahse kan tih chin leh hmachhawpte ngaihtuahin thawktute kan phur a, MIFCO hmang hian nasa taka ram siam danglam kan tum a ni. Mizo kuthnathawktute hi kaihhruai thiam a, an thawh hlawh tha taka an hmu thei dawn a nih chuan an taima em em a ni. Tunah hian hmachhawp kan nei mek a, rawtuai leh baibing tin siam chhoh kan tum a, hmalakna hmasa atan lakhuihthei leh sapthei tui, plastic bottle teah in mai theih (ready to serve) dawr hrang hranga zawrh turin kan siam dawn a ni," a ti.
Minute 20 awh MIFCO Documentary Film tlangzarhna hun hi Pu H.Lalrochama, General Manager, MIFCO chuan a kaihruai a, he documentary film-ah hian Mizorama Lakhuihthei leh Sapthei chinna khaw hrang hrang - Chawngtlai, Khawihai, Sialhawk New leh Chalranga kuthnathawktuten hma an lak dan leh MIFCO-in a buaipui chhoh dan te, Chhingchhip khuaa MIFCO-in thei leh thlai chi hrang hrang an buaipui dan te, Zemabawk huamchhung Bungbanglaa mipuite ei tur sa thianghlim an sawngbawl dante hmuhnawm taka tarlan a ni.
